सङ्घीय संसद् सचिवालय
नेपालको संविधानको धारा १०७ बमोजिम सङ्घीय संसद्को काम कारबाही सञ्चालन तथा व्यवस्थापन गर्न सङ्घीय संसद् सचिवालय रहेको छ। यस सचिवालयको मुख्य जिम्मेवारी र कार्य संघीय संसद् र यसका दुवै सदनका कार्यहरुमा प्रशासकीय सहयोग गर्नु हो। २०७२ असोज ३ गते नेपालको संविधान जारी हुनु अघि संविधानसभाको सचिवालयको रुपमा संविधानसभा/व्यवस्थापिका-संसद् सचिवालयको रुपमा स्थापित सचिवालय नै हाल सङ्घीय संसद् सचिवालयको रुपमा रहेको छ।
सङ्घीय संसद् सचिवालय एक प्रशासनिक निकाय हो र सचिवालयलाई सञ्चालन गर्ने प्रयोजनको लागि देहाय बमोजिमको सचिवालय सञ्चालन तथा व्यवस्थापन समिति रहने व्यवस्था सङ्घीय संसद् सचिवालय सम्वन्धी ऐन, २०६४ मा रहेको छ:
(क) सभामुख – सभापति
(ख) राष्ट्रिय सभाको अध्यक्ष – सदस्य
(ग) उपसभामुख – सदस्य
(घ) राष्ट्रिय सभाको उपाध्यक्ष - सदस्य
(ङ) महासचिव – सदस्य
(च) प्रतिनिधि सभाको सचिव – सदस्य
(छ) राष्ट्रिय सभाको सचिव – सदस्य
(ज) सचिवालय सचिव (संसदीय अध्ययन तथा अनुसन्धान) – सदस्य
(झ) सचिवालय सचिव (प्रशासन) – सदस्य – सचिव
सङ्घीय संसद् सचिवालयका मुख्य कार्यहरु
सचिवालयको प्रमुख उद्देश्य भन्नु नै सङ्घीय संसद्को काम कारवाहीलाई आवश्यक पर्ने प्रशासनिक, व्यवस्थापकीय एवं प्राविधिक सहयोग उपलब्ध गराउनु हो। वुँदागत रुपमा सचिवालयका प्रमुख कार्यहरु देहाय वमोजिमका रहेका छन्ः
- सङ्घीय संसद्, सङ्घीय संसद्का समिति, पदाधिकारी र सदस्यलाई आवश्यक सेवा सुविधा उपलब्ध गराउने।
- सङ्घीय संसद्का कामकारवाही सुचारु रुपले सञ्चालन गर्न प्रशासनिक, आर्थिक र भौतिक व्यवस्थापन सम्वन्धी कार्यलाई व्यवस्थित र प्रभावकारी वनाउने।
- सङ्घीय संसद्का सूचना प्रणालीलाई प्रभावकारी बनाउने तथा संघीय संसद परिसरमा सुरक्षा व्यवस्था मिलाउने।
- सङ्घीय संसद्को संसदीय दलका कार्यालयलाई आवश्यक सेवा सुविधा उपलव्ध गराउने।
- सङ्घीय संसद्, सङ्घीय संसद्का समितिहरुका वैठकहरुको व्यवस्थापन गर्ने।
- नियमित विधायन सम्वन्धी कार्यमा सहयोग पुर्याउने तथा संसदीय समितिबाट हुने अनुगमन सम्वन्धी कार्यमा समेत सहयोग पुर्याउने।