राष्ट्रिय सभाका सम्माननीय अध्यक्ष नारायण प्रसाद दाहालले गणतन्त्र दिवसको अवसरमा व्यक्त गर्नुभएको शुभकामना सन्देश

नेपाली जनताको ऐतिहासिक सङ्‍घर्ष, बलिदान र त्यागबाट स्थापित सङ्घीय लोकतान्त्रिक गणतन्त्र नेपालको औपचारिक घोषणा भएको दिन गणतन्त्र दिवसका अवसरमा स्वदेश तथा विदेशमा रहनुभएका सम्पूर्ण नेपाली दिदीबहिनी दाजुभाइहरूमा हार्दिक शुभकामना व्यक्त गर्दछु।
वि.सं. २०६५ जेठ १५ गते संविधान सभाबाट निरङ्‍कुश राजतन्त्रको अन्त्य गर्दै सङ्घीय लोकतान्त्रिक गणतन्त्र नेपालको घोषणा हुनु नेपाली जनताको सार्वभौम अधिकार, लोकतान्त्रिक आकाङ्क्षा र राजनीतिक चेतनाको ऐतिहासिक उपलब्धि हो। यस उपलब्धिसम्म पुग्न विभिन्न कालखण्डमा भएका जनआन्दोलन, सशस्त्र तथा सशक्त लोकतान्त्रिक सङ्‍घर्ष तथा परिवर्तनका अभियानमा आफ्नो अमूल्य जीवन उत्सर्ग गर्ने महान् सहिदहरूप्रति हार्दिक श्रद्धाञ्जली अर्पण गर्दछु। साथै आन्दोलनका क्रममा घाइते, अपाङ्‍ग तथा पीडित हुनुभएका सम्पूर्णप्रति उच्च सम्मान व्यक्त गर्दछु।
गणतन्त्र केवल शासन प्रणालीको परिवर्तन मात्र होइन, नागरिक अधिकार, समावेशिता, सामाजिक न्याय, समान अवसर तथा जनसहभागितामा आधारित लोकतान्त्रिक राज्य व्यवस्थाको आधार पनि हो। नेपालको संविधानले परिकल्पना गरेको समृद्ध, समुन्नत र न्यायपूर्ण समाज निर्माणका लागि संविधानको प्रभावकारी कार्यान्वयन, सुशासन, पारदर्शिता तथा दिगो विकासप्रति सबै पक्षको प्रतिबद्धता अझ आवश्यक रहेको छ। गणतन्त्रको विकल्प पश्चगामी वङ्‍शीय तन्‍त्र हुनै सक्दैन। गणतन्त्रको विकल्प अझ उन्नत र समृद्ध गणतन्त्र नै हो। संविधानले निर्दिष्ट गरेअनुरुप समाजवादउन्मुख आत्मनिर्भर अर्थतन्त्रको निर्माण गर्दै सुशासनसहितको राज्य सञ्चालनका पक्षमा दृढतापूर्वक उभिनु अहिलेको आवश्यकता हो।
यस दिवसले सम्पूर्ण नेपालीहरूबीच राष्ट्रिय एकता, आपसी सद्भाव, लोकतान्त्रिक संस्कार तथा संविधानप्रतिको आस्थालाई थप सुदृढ बनाउँदै राष्ट्र निर्माणको साझा अभियानमा प्रेरणा प्रदान गरोस् भन्ने कामनासहित गणतन्त्र दिवस २०८३ को हार्दिक शुभकामना व्यक्त गर्दछु।

वि.सं. २०८३ जेठ १५ । ने.सं. ११४६ अनलाथ्वः १३, शुक्रबार
अध्यक्ष